Geguritan: Srimpi Pandhelori

Srimpi Pandhelori

Dening Cipuk Wulan Adhasari

Penari kang cacahe papat

Marakake segering mripat

Kawiwitan saka lungguh sila

Ora lali ngaturake sungkem kang andhap asor

Lakune penari kang alon kaya macan luwe

Kairing dening gamelan kang nentremake ati

Srimpi Pandhelori saka Ngayogyakarta

Samirana, toya, brama, lan bawana

Katampilake dening penari kang cacahe papat

Srimpi Pandhelori uga nduweni arti

Carita saka tanah Jawa

Dewi Sirtupilaeli lan Dewi Sudarawerti nduweni impen kang padha

Impen marang salah sawijining pengeran saka tanah Arab

Ora ono kang kalah utawa jaya

Kabeh selaras uga tumata

Sang pengeran banjur milih kaloro dewi

Kaselarasan dening tetabuhan gamelan lan lumaku

Katon nduweni karya seni ingkang agung

Uga makna saka carita kang bisa kapethik